Аҧсуа ҳәынҭқарратә драматә театр аҿы имҩаҧысыз ахеидкыла аиҿкаара аус иазкыз аизара ду иалахәын Аҧсны ахада ихаҭыҧуаҩ Бадра Гәынба, аҧыза-министр ихаҭыҧуаҩ Владимир Делба, Аҧсны ахада иусбарҭа аиҳабы Џьансыхә Нанба, ауаажәларра, аинтеллигенциа рхаҭарнакцәа.

Ажәахәқәа рыла аизараҿы иқәгылеит ахеидкыла аиҿкааҩцәа ируаӡәку Нодар Ҷанба, Нугзар Логәуа, иара убас Аҧсны аҭҵаарадыррақәа ракадемиа апрезидент Зураб Џьапуа, Аҳәынҭқарра ахада иҿы иҟоу Астратегиатә ҭҵаарақәа рцентр аиҳабы Виачеслав Чрыгба.

Аҧсны аинтеллигенциа рхеидкыла аиҿкааратә еилатәара иаднакылеит ақәҵара.

Аизара ду ирыланаҳәоит Аҧсны аҩныҵҟатәи адәахьтәи, аекономикатә, асоциалтә, агәабзиарахьчаратә, абзазаратә, аҵарадырратә, акультуратә, абызшәатә, адемографиатә, арепатриациатә  зҵаарақәа рыла аҳәынҭқарраҿ имҩаҧысуа аполитикатә знеишьақәа гәцаракрыла аҽрылахәра ишазхиоу.