Гәаартәылатәи аицәажәараҿы анацәа аҳҭнықалақь ахада изеиҭарҳәеит ргәы зызхьуа, насгьы ацхыраара ахьырҭаху атәы.

Урҭ ражәақәа рыла, анацәа рзы аигәныҩра хадароуп. Аибашьраҿы зыхшара ҭахаз иахьынхозаалакгьы, реибабара, реицәажәара ргәы арҟажоит, ахылаҧшра анроуа, рхьаа, маҷк иадамхаргьы, еиқәтәоит. Убри аҟынтә анацәа рхеидкыла алахәылацәа, зыхшара аибашьраҿы иҭахаз абыргцәа – Аҟәа анаҩс, Аҧсны анҭыҵгьы аамҭа-аамҭала ирҭаауеит.

Аҧснынтәи анацәа хатәгәаҧхарала Нхыҵ Кавказнтәи еибашьуаз рҭаацәа ирҭаахьеит. Хықәкыс ирымоуп аиааирамш аламҭалаз Чечентәыла ацара. Аҟәа ақалақь ахада уи аусаҿы ацхыраара шроуа иақәиргәыӷит.

Анацәа аиҧылараҿы ирзааҭгылеит аҳҭнықалақь аҿы иҟоу аиҭакрақәеи апроблемақәеи. Ргәы иҵхо зҵаараны иҟоуп аҭаацәара ҿыцқәа рынхарҭа ҭыҧқәа рыҟамзаара. Убри аан иазгәарҭеит зыхшара ҭахаз анацәа аҳәынҭқарра аҟынтәи ахылаҧшра шрымоу. Аҟәа инхо зыхшара аибашьраҿы иҭахаз аҧсшьарахьы рышьҭразы алшрақәа азыҧшааразы аҳәара ҟарҵеит.

Анацәа рхеидкыла Аҟәатәи аҟәша есышықәса Аҟәа ахадара имҩаҧырго еиуеиҧшым аусмҩаҧгатәқәа рҿы ацхыраара рынаҭоит. Ԥхьаҟагьы адгылара шроуа азы Аҟәа ақалақь ахада Ҭемыр Агрба ажәа риҭеит.