Версия для печати
22 октября 2020

Аслан Бжьаниа Аԥсны жәлар рахь ааԥхьара ҟаиҵеит

Аԥсны Аҳәынҭқарра Ахада Аслан Бжьаниа телехәаԥшрала Аԥсны жәлар рышҟа ааԥхьара ҟаиҵеит.

Ааԥхьара атекст аҟны иҳәоуп:

«Ҳаҭыр зқәу ажәлар!
Адунеи зегьы аҟнеиԥш, ҳара ҳтәылагьы аамҭа хьанҭа иҭагылоуп.  

Шамахамзар, аконтинентқәа зегьы зымҽхазкыз КОВИД-19 аҿкы зыхьыз ауааԥсыра рхыԥхьаӡара есааира аизҳара атенденциа Аԥсынгьы аланакит. Ҳазҭагылоу аамҭазы ареспубликаҟны ачымазара зыхьыз ауаа рхыԥхьаӡара х-нызқьҩык иреиҳахеит, ари аҭагылазаашьа уацәшәартә иҟоуп. Убри аангьы ихәышәтәу рхыԥхьаӡарагьы иазҳауеит. Уажәы урҭ зықьҩыки бжаки иреиҳауп.  
Уи алыршахеит ззанааҭ гәыкала иазыҟоу амедицинатә усзуҩцәа русуреи, урҭ зны-зынлагьы иаадырԥшуа афырхаҵареи ирыбзоураны.

Урыстәылатәи Афедерациа ҳареи ҳабжьара имҩаԥгаз аиҿцәажәара иалҵшәаны иалыршахеит Урыстәылатәи Афедерациа атәылахьчара аминистрра афункциа рацәа змоу ахәышәтәырҭа Аԥсныҟа аашьҭразы аиқәшаҳаҭра.

Ахәышәтәырҭа шьақәыргылоуп аҟәатәи асасааирҭа «Аиҭар» аҟны, уи ачымазҩцәа рыдкыларагьы иалагахьеит. Адәнытәи амедицинатә ҟәша 150-ҩык ачымазҩцәа рыстационартә хәышәтәразы зыда ԥсыхәа ыҟам мыругала еибыҭоуп. Адәнытәи ахәышәтәырҭа аусура мҩаԥыргоит 100–ҩык инареиҳаны азыҟаҵара бзиа змоу арратә медицинатә усзуҩцәа.

Аԥсны жәлар рыхьӡала Урыстәылатәи Афедерациа Ахада Владимир Владимир-иԥа Путин, Урыстәыла Атәылахьчара аминистр Сергеи Кужугет-иԥа Шоигу иҭабуп ҳәа расҳәоит ҳара ҳзы акрызҵазкуа аус аҟны иҟарҵаз ацхырааразы.  

Ауааԥсыра коронавирустә ҿкы рацәыхьчаразы акоординациатә штаб азыӡба шьаҭас иҟаҵаны, сара адҵа снапы аҵазҩит атәылаҟны аԥкратә уснагӡатәқәа ралагаларазы.  
Ҳәарада, зегьы ҳзы имариаӡам ҳзышьцылоу аԥсҭазаара акәымкәа, аԥкрақәа рықәныҟәара. Аха, рыцҳарас иҟалаз, ҳазҭагылоу аамҭазы даҽа мҩакы ыҟаӡам, аҳәара ҟасҵоит ари еилкаарыла шәазнеирц азы.  
Имҩаԥысуа ауснагӡатәқәа зегьы ҳҳәынҭқарразы акрызҵазкуа ҳтәылауаа рыԥсҭазаареи ргәабзиареи рыхьчара ауп изызку.  

Адҵа инақәыршәаны атәылауаа џьоукы рџьатә напынҵақәа рыҟнытә рхы иақәиҭтәуп руалафахәқәа еиқәырханы.  
Убри аангьы, аҳәынҭқарра иаланагалаз аԥкрақәа аҭагылазаашьа шьаҭанкыла аԥсахра рылшаӡом дасу ахдырра ааҳмырԥшыр, ауаажәларра рҿаԥхьа иҳаду ҭакԥхықәра дула ҳазымнеир.  

Ҳаҭыр зқәу ҳауаажәлар, ааԥхьара ҟасҵоит ада ԥсыхәа ыҟамкәа, адәахьы шәдәылымҵлан, асабрадақәа ныҟәыжәгала, аспециалистцәа рабжьгарақәа шәрықәныҟәала.  
Хымԥада, ҳара ари аҭагылазаашьа ҳалҵуеит, ҳзышьцылоу аԥсҭазаарахь ҳхынҳәуеит, ачарақәагьы рура еиҭахацыркхоит.  
Уажәы ишьақәгылаз аҭагылазаашьа иҳаднаҵоит аҽыԥхьакра, ауаа рацәа злоу аусмҩаԥгатәқәа мап рыцәкра.  

Ауааԥсыра коронавирустә ҿкы рацәыхьчара атәыла анапхгаразы аԥхьа игылоу уснагӡатәуп. Агәра ганы сыҟоуп атәылауаа рыԥсҭазаареи ргәабзиареи рыхьчаразы иҳаду ауалԥшьа ахӡыргара, аполитикатә феида злалугаша акы акәӡам ҳәа.
  
Еилкаауп, иаалырҟьаны ҳмедицинаҟны иҟоу ауадаҩрақәа рыӡбара шалымшо. Аха атәыла анапхгара ари аус ԥыжәара аҭаны, шьаҿа шьаҿала ҳтәылауаа ргәабзиара ахылаԥшразы азҵаарақәа рыӡбара иаҿуп, уи алшарақәа азыԥшааны.
  
Пандемиа иаҿагыланы ақәԥараҿы хәажәкырамза инаркны иахьа уажәраанӡа аиҳабыреи, абизнес-уаажәларреи, Москвеи Ҭырқәтәылеи инхо ҳдиаспореи, жәларбжьаратәи аиҿкаарақәеи рылшарақәа еидкыланы уи иазоужьуп миллиард мааҭк аԥшьбарак.

Аҳәынҭқарра авирусҭҵааратә лабораториа аштаттә еихшанҵа арҭбааразы иаҭаху аԥаратә хархәагақәа азоунажьит. Ирыдыркылеит иазыҟарҵаз аусзуҩцәа ҿыцқәа. Ахыркәшара мҩаԥысуеит аҵәыҵәри ареанимациатә палатақәа рахь рнагаразы. Хара имгакәа иаараны иҟоуп зныҟәгара маншәзалоу ихәыҷу арентген–аппаратқәа хԥа, ареанимобилқәа, арԥҳақәа рышҟа аҳауа нашьҭразы аппаратқәа, ПЦР- алабораториақәа рзы амыругақәа.

Имҩаԥысуеит араионтә хәышәтәырҭақәа рыҟны апалатақәа реиқәыршәара. Галтәи Араионтә хәышәтәырҭа хадаҟны - 10 каруаҭк, Очамчыратәи ахәышәтәырҭаҟны - 20. Гагратәи араионтә хәышәтәырҭаҟны ихдыркәшоит ҷыдалатәи апалатақәа мыругала реиқәыршәара 70 – ҩык ачымазҩцәа рзы. Аҟәа аҿкычымазара хәышәтәырҭаҟны иаԥҵоуп алшара  30 –ҩык ачымазҩцәа рыдкыларазы. Ихыркәшахоит Аҟәатәи ақалақьтә клиникатә хәышәтәырҭа апалатақәа разырхиара.
  
Аԥсни Урыстәылеи ргәабзиарахьчаратә министррақәа ирыбжьоу аиқәшаҳаҭра инақәыршәаны ҳреспубликахь иааиԥмырҟьаӡакәа иаауеит амедицинатә усзуҩцәа рбригадақәа. Гәдоуҭатәи ковид-хәышәтәырҭаҟны аԥсуа хәышәтәҩцәа ацхыраара рырҭоит рҽеиҭныԥсахло Москва, Башкорҭосҭан Ареспублика, Нижегородтәии Калининградтәии аобластқәа рыҟнытә 30 –ҩык аҳақьымцәа.  Анагӡара мҩаԥысуеит ианаҭахха згәабзиара уашәшәыроу, иӷәӷәоу ачымазцәа Урыстәылаҟа ргаразы аиқәшаҳаҭра.  

Ҳауаажәлар шәхацкы!

Ҳазҭагылоу аамҭа мариам. Сшәыҳәоит  шәхы шәыхьча, шәреиҷаҳа шәааигәара иҟоу ауаа. Сшәыҳәоит, иааҳарҧшып ахдырра ҳаракы. Аамҭала иаанаҳкылап ачарақәа, аизара дуқәа, иҳармаҷып аҧсрақәа рахь аныҟәара. Даара ишәарҭоуп иаҳзааиз ачымазара.
Хымҧада уи ҳаиааиуеит, иҳаулоит ачарақәа, имҩаҧаҳгалоит аныҳәақәа. Аха иахьа иаанаҳкылароуп зегьы, ҳазхәыцроуп уаҵәтәи амш.

Агәабзиара шәымазааит зегьы, Анцәа ду илаҧш ҳхызааит!»

 

Прочитано 1088 раз